Atasu адамдары: 13 жылда жас маманнан Ташкенттегі кеңсе басшысына дейін

Баян Нұртаева — Atasu Group компаниясының Ташкенттегі өңірлік кеңсесінің басшысы. Компанияда 2013 жылдан бері еңбек етеді.

Он үш жыл бұрын Баян Нұртаеваның әр жұмыс күні бір сұрақтан басталатын:

— Станцияда қанша вагон бар? Ал клиенттің кірме жолында қаншасы тұр?

Бұл сұрақ әр таң сайын қойылатын. Оған шамамен емес, дәл сол күнгі жағдай бойынша, әр вагонға қатысты нақты жауап беру қажет еді.

Баян ол кезде Atasu компаниясына жаңадан келген болатын. Логистика саласы туралы мүлде хабары жоқ еді: теміржол жүкқұжатын қалай оқу керегін де, жөнелту станциясы мен түйісу станциясының айырмашылығын да білмейтін.

Сол жылы Atasu жаңа қызметкерлерді жұмысқа қабылдап жатқан. Жақындарының бірі оған өзін осы салада байқап көруге кеңес береді. Баян тәуекел етіп көрді. Кейін белгілі болғандай, бұл шешім оны компаниямен он үш жылдан астам уақытқа байланыстырады.

Алғашқы клиентін оған жұмысқа келгеннен кейін көп ұзамай сеніп тапсырды. Әрине, ол тәжірибелі тәлімгердің жетекшілігімен жұмыс істеді. Қазір Баян сол кезең туралы сабырмен айтады. Алайда кеше ғана жұмысқа келген жас маман үшін нақты клиенттің жүгі мен қаражатына тікелей әсер ететін сұрақтарға күн сайын жауап беру оңай болмағаны анық.

«Алғашында бәрін бір уақытта бақылау мүмкін емес сияқты көрінетін. Бірақ біртіндеп ең бастысы — жағдайға тереңірек үңілу екенін түсінесің. Тек жөнелту және межелі станцияларға емес, әр вагонмен жасалған операцияларға да назар аудару керек. Көп жағдайда жауап дәл сол жерден табылады».

Жолдағы әр вагонның өз қозғалыс тарихы бар: оны қабылдайды, құрамнан ағытады, басқа жолға ауыстырады, тексеруден өткізеді. Егер бағыттың бастапқы және соңғы нүктесіне ғана назар аударсаң, кідірістің нақты себебі көрінбей қалуы мүмкін.

Баян мәселенің себебін клиент сұрақ қойып үлгермей тұрып анықтауды үйренді.

Ол өзінің алғашқы клиентін әлі күнге дейін ризашылықпен еске алады. Дәл сол клиенттің тасымалдарын сүйемелдеу барысында мамандықтың қыр-сырын меңгерді. Сол кезде логистиканың өзі шынымен дамығысы келетін сала екенін алғаш рет сезінді.

Ташкенттегі кеңсе де Баянның көз алдында өзгерді. Шағын бөлімше уақыт өте келе халықаралық тасымалдардың маңызды өңірлік орталығына айналды.

Бүгінде кеңсе командасы Қазақстан, Өзбекстан және Орталық Азияның басқа елдері арасындағы тасымалдарды сүйемелдейді. Қазір олар он үш жыл бұрын мүмкін емес болып көрінген көлемдегі жүктермен жұмыс істейді.

Ташкенттегі кеңсе дамып жатқан кезеңде Atasu Group жаңа терминалдар ашып, халықаралық желісін кеңейтіп, командасын ұлғайтты.

Осы жылдар ішінде не өзгеріссіз қалды деген сұраққа Баян бірден:

— Адамдар, — деп жауап береді.

Оның айтуынша, алғашқы жұмыс күнінде өзін қарсы алған ұжымның жылылығы мен әріптестердің қолдауы әлі де сақталған.

Енді жаңа қызметкерлерді Баянның өзі қарсы алады. Осындай сәттерде ол он үш жыл бұрынғы өзін еске түсіреді. Жаңа маман өзінің алғашқы «станцияда қанша вагон бар?» деген сұрағына сенімді жауап бере бастағанға дейін жанынан табылуға тырысады.

Баян адамдардың бойындағы екі қасиетті ерекше бағалайды: жауапкершілік пен үйренуге деген ынта. Оның пікірінше, қалғанының бәрін жұмыс барысында меңгеруге болады.

Он үш жыл бұрын ол тәлімгерлерінің сұрақтарына жауап іздейтін.

Бүгінде жауап іздегендер Баянның өзіне келеді.